საქართველოში შინამეურნეობების 93.5%-ს ინტერნეტზე წვდომა აქვს

ქალაქებში ინტერნეტზე წვდომა 96.8%-ს შეადგენს, ხოლო სოფლებში — 89%-ს. რეგიონებს შორის ყველაზე მაღალი მაჩვენებელი თბილისში დაფიქსირდა და 98.2% შეადგინა. აჭარაში კი ინტერნეტზე წვდომა 96.3%-ს აღწევს.

კვლევა ასევე აჩვენებს, რომ ბოლო სამი თვის განმავლობაში ექვსი წლისა და უფროსი ასაკის მოსახლეობის 89.6%-მა ინტერნეტი გამოიყენა. ახალგაზრდებში მაჩვენებელი კიდევ უფრო მაღალია — 15-29 წლის ასაკობრივ ჯგუფში ინტერნეტის მომხმარებელთა წილი 99.6%-ს აღწევს.

ინტერნეტის გამოყენების მთავარი მიზანი სოციალური ქსელებია, რომელსაც მომხმარებელთა 97.5% იყენებს. თითქმის ასეთივე მაღალია აუდიო და ვიდეოზარების მაჩვენებელი — 97%. ინტერნეტბანკინგით სარგებლობს გამოკითხულთა 61%, ხოლო ჯანმრთელობასთან დაკავშირებულ ინფორმაციას ონლაინ 54.5% ეძებს.

კვლევამ ელექტრონული კომერციის მზარდი როლიც აჩვენა. ბოლო 12 თვის განმავლობაში 15 წლისა და უფროსი ინტერნეტმომხმარებლების 38.6%-მა ონლაინ შეიძინა ან შეუკვეთა საქონელი ან მომსახურება. ქალაქებში ეს მაჩვენებელი 42.7%-ს შეადგენს, სოფლებში კი 31%-ს.

მონაცემები მიუთითებს, რომ ინტერნეტი საქართველოში უკვე ყოველდღიური ცხოვრების თითქმის ყველა სფეროს მოიცავს — კომუნიკაციას, საბანკო მომსახურებას, ონლაინ ვაჭრობას, განათლებას, ინფორმაციასა და სამუშაოს ძიებას.