თბილისში ახალი ტრამვაის ხაზის მშენებლობა დაიწყო — დიღომი დიდუბეს

თბილისის მერის, კახა კალაძის განცხადებით, ახალი ხაზი დედაქალაქის სატრანსპორტო სისტემის განვითარებისთვის მნიშვნელოვანი ნაბიჯია. პროექტი რამდენიმე ეტაპს მოიცავს — კონცეპტუალურ დაპროექტებას, დეტალურ საინჟინრო სამუშაოებსა და უშუალოდ სამშენებლო პროცესს.

ტრამვაის მარშრუტის სავარაუდო სიგრძე 7,5 კილომეტრი იქნება. ის დიდი დიღმის მჭიდროდ დასახლებულ უბანს დიდუბის მეტროსთან დააკავშირებს, რაც მოსახლეობას ქალაქის სხვა უბნებთან გადაადგილების უფრო სწრაფ ალტერნატივას შესთავაზებს.

პროექტის განხორციელების საერთო ვადა დაახლოებით 36 თვეა, თუმცა ყველა თანმხლები პროცედურის გათვალისწინებით, სრული პროექტის დასრულებას ოთხ წლამდე პერიოდი დასჭირდება. ტრამვაის ხაზთან ერთად შესაბამისი ინფრასტრუქტურაც აშენდება, მათ შორის ტრამვაის დეპო.

კახა კალაძემ აღნიშნა, რომ მშენებლობის პერიოდში ქალაქში გარკვეული დროებითი შეფერხებები გარდაუვალი იქნება. მუნიციპალიტეტი მოსახლეობას სატრანსპორტო ცვლილებების შესახებ წინასწარ მიაწვდის ინფორმაციას და შეეცდება სამშენებლო სამუშაოებით გამოწვეული დისკომფორტის შემცირებას.

ახალი ტრამვაის დაბრუნებას თბილისის სატრანსპორტო ისტორიაში სიმბოლური მნიშვნელობაც აქვს. პროექტის ავტორების განცხადებით, დიღომი–დიდუბის ხაზი შესაძლოა მომავალში დედაქალაქის უფრო ფართო თანამედროვე ტრამვაის ქსელის საფუძველი გახდეს.