ნასას მისია მთვარისკენ: დედამიწა, როგორც კოსმოსიდან ჩანს

ნასამ არტემიდა II-ის მისიის ეკიპაჟის მიერ „ორიონის“ კოსმოსური ხომალდიდან, მთვარისკენ მიმავალმა გადაღებული დედამიწის ფოტოები გამოაქვეყნა. ყველა სურათი მეთაურმა რიდ უაიზმანმა გადაიღო. გამოსახულებები სოციალურ ქსელ X-ზე გამოქვეყნდა.

„ჩვენი მშობლიური პლანეტის განსაცვიფრებელი, მაღალი გარჩევადობის ახალი კადრები გვაქვს“, – ნათქვამია პუბლიკაციაში.

პირველ სურათზე პლანეტის მესამედია აღბეჭდილი, რომელიც ხომალდის ილუმინატორიდან ჩანს. კადრზე კაშკაშა ლურჯი მსოფლიო ოკეანე და თეთრი ღრუბლებით დაფარული ზედაპირი გამოირჩევა.

მეორე ფოტოზე დედამიწის სრული დისკია გადაღებული. ამჯერად უაიზმანმა ორი მატერიკიც აღბეჭდა – კადრის მარცხენა მხარეს აფრიკა ჩანს, მარჯვნივ კი ღრუბლებს მიღმა პირენეის ნახევარკუნძულია. პლანეტის თავზე მწვანე ფერის ჩრდილოეთის შუქი (polar lights) მოჩანს.

„მთლიანად ვხედავთ ჩვენს მშობლიურ პლანეტას, ნათელ ლურჯ და მურა ტონებში შეფერილს. მწვანე ჩრდილოეთის შუქი ატმოსფეროსაც ანათებს“, – ასეთია სურათის ხელმოწერა.

არტემიდა II – პირველი პილოტირებადი მისია მთვარისკენ აპოლო 17-ის შემდეგ (1972 წლის დეკემბერი), ასევე პირველი დაბალი დედამიწის ორბიტის მიღმა ნახევარ საუკუნეზე მეტი ხნის განმავლობაში.

არტემიდა II-ის მისიის მიზანი მთვარის გარს შემოფრენაა. ხომალდი დედამიწის თანამგზავრის ზედაპირზე არ დაეშვება. მისიის ხანგრძლივობა დაახლოებით 10 დღეა.

SLS სუპერმძიმე რაკეტა „ორიონის“ კოსმოსურ ხომალდთან ერთად კეიპ-კანავერალიდან 2 აპრილის ღამეს გაუშვეს. არტემიდა II-ის ეკიპაჟში ოთხი ადამიანია: სამი ამერიკელი ასტრონავტი და ერთი კანადელი. რიდ უაიზმანის გარდა, ფრენაში მონაწილეობენ პილოტი ვიქტორ გლოვერი, ასევე მისიის სპეციალისტები კრისტინა კოხი და ჯერემი ჰანსენი.

ხომალდი დაბალი დედამიწის ორბიტის მიღმა 5 წუთსა და 55 წამში გავიდა. 3 აპრილის ღამეს „ორიონი“ ტრანსლუნურ ორბიტაზე გადავიდა და მთვარისკენ გაემართა.